ភ្នំពេញ៖ ក្នុងសប្ដាហ៍ទី៣ ខែកុម្ភៈ កម្ពុជាទទួលបានទេសចរជាង ៣៦ម៉ឺននាក់ ក្នុងនោះភ្ញៀវបរទេសផ្ទៃក្នុង ៤៦ ៤៥៣នាក់ ខណៈគោលដៅទេសចរណ៍សំខាន់ចំនួន ៨ខេត្ត-ក្រុង។

របាយការណ៍ក្រសួងទេសចរណ៍បានឱ្យដឹងថា ចាប់ពីថ្ងៃទី១៣-១៩ ខែកុម្ភៈ ឆ្នាំ២០២៣ នៅទូទាំងប្រទេសទទួលបានភ្ញៀវទេសចរសរុប ៣៦០ ១៣៥នាក់ ក្នុងនោះភ្ញៀវជាតិ ៣១៣ ៦៨២នាក់ ភ្ញៀវបរទេសផ្ទៃក្នុង ៤៦ ៤៥៣នាក់។

ទន្ទឹមនោះដែរ គោលដៅទេសចរណ៍សំខាន់ៗ រួមមាន៖ ខេត្តត្បូងឃ្មុំ ខេត្តសៀមរាប រាជធានីភ្នំពេញ ខេត្តកំពត ខេត្តកំពង់ចាម ខេត្តបាត់ដំបង ខេត្តស្វាយរៀង និងខេត្តព្រះសីហនុ ដែលមានភ្ញៀវទេសចរណ៍ច្រើនជាងគេចំនួន ៧២ ០៥៦នាក់។

ក្រសួងទេសចរណ៍កត់សម្គាល់ថា ចរន្តភ្ញៀវទេសចរក្នុងស្រុកនៅតែបន្តបង្ហាញសញ្ញាវិជ្ជមាន ប្រកបដោយភាពសុទិដ្ឋិនិយមជាមួយចំនួនជាង ៣៦ម៉ឺននាក់ក្នុងសប្តាហ៍នេះ ខណៈដែលសប្តាហ៍កន្លងមកកម្ពុជាទទួលបានភ្ញៀវសរុបប្រមាណ ២៩ម៉ឺននាក់។

គួរឱ្យដឹងដែរថា ការបន្តកើនឡើងនៃចរន្តភ្ញៀវទេសចរក្នុងស្រុកនាដើមឆ្នាំ២០២៣នេះ កំពុងបង្ហាញសញ្ញាវិជ្ជមានជាមួយការមកដល់ជាបន្តបន្ទាប់នៃភ្ញៀវទេសចរអន្តរជាតិ ខណៈរដ្ឋាភិបាលចិនអនុញ្ញាតឱ្យប្រជាជនចេញក្រៅប្រទេសឡើងវិញ ដោយអាកាសយានដ្ឋានអន្តរជាតិកងកេង ខេត្តព្រះសីហនុ បានទទួលជើងហោះហើរលើកដំបូងមកពីប្រទេសចិន នាព្រឹកថ្ងៃទី២៧ ខែមករា ឆ្នាំ២០២៣ ជាមួយវត្តមានភ្ញៀវទេសចរចំនួន ១០៤នាក់ និងក្រុមអ្នកបម្រើការលើយន្តហោះ ៦នាក់ទៀត សរុប ១២០នាក់៕